MOTHER'S SHAYARI

chaltī phirtī huī ā.ankhoñ se azaañ dekhī hai

maiñ ne jannat to nahīñ dekhī hai maañ dekhī hai

MUNAWWAR RANA

• 
  

duā ko haat uThāte hue laraztā huuñ

kabhī duā nahīñ māñgī thī maañ ke hote hue

IFTIKHAR ARIF

• 
  

kal apne-āp ko dekhā thā maañ kī āñkhoñ meñ

ye ā.īna hameñ būḌhā nahīñ batātā hai

MUNAWWAR RANA

• 
  

ek muddat se mirī maañ nahīñ soī 'tābish'

maiñ ne ik baar kahā thā mujhe Dar lagtā hai

ABBAS TABISH

• 
  

abhī zinda hai maañ merī mujhe kuchh bhī nahīñ hogā

maiñ ghar se jab nikaltā huuñ duā bhī saath chaltī hai

MUNAWWAR RANA

• 
  

kisī ko ghar milā hisse meñ yā koī dukāñ aa.ī

maiñ ghar meñ sab se chhoTā thā mire hisse meñ maañ aa.ī

MUNAWWAR RANA

• 
  

is tarah mere gunāhoñ ko vo dho detī hai

maañ bahut ġhusse meñ hotī hai to ro detī hai

MUNAWWAR RANA

jab bhī kashtī mirī sailāb meñ aa jaatī hai

maañ duā kartī huī ḳhvāb meñ aa jaatī hai

MUNAWWAR RANA

tere dāman meñ sitāre haiñ to hoñge ai falak

mujh ko apnī maañ kī mailī oḌhnī achchhī lagī

MUNAWWAR RANA

• 
  

barbād kar diyā hameñ pardes ne magar

maañ sab se kah rahī hai ki beTā maze meñ hai

MUNAWWAR RANA

sab ne maanā marne vaalā dahshat-gard aur qātil thā

maañ ne phir bhī qabr pe us kī rāj-dulārā likkhā thā

AHMAD SALMAN

kitāboñ se nikal kar titliyāñ ġhazleñ sunātī haiñ

tiffin rakhtī hai merī maañ to basta muskurātā hai

SIRAJ FAISAL KHAN

• 
  

tifl meñ bū aa.e kyā maañ baap ke atvār kī

duudh to Dibbe kā hai ta.alīm hai sarkār kī

AKBAR ALLAHABADI

• 
  

maañ kī duā na baap kī shafqat kā saayā hai

aaj apne saath apnā janam din manāyā hai

ANJUM SALEEMI

maañ kī āġhosh meñ kal maut kī āġhosh meñ aaj

ham ko duniyā meñ ye do vaqt suhāne se mile

KAIF BHOPALI

• 
  

ye aisā qarz hai jo maiñ adā kar hī nahīñ saktā

meñ jab tak ghar na lauTūñ merī maañ sajde meñ rahtī hai

MUNAWWAR RANA

ghar lauT ke ro.eñge maañ baap akele meñ

miTTī ke khilaune bhī saste na the mele meñ

QAISARUL JAFRI

• 
  

din bhar kī mashaqqat se badan chuur hai lekin

maañ ne mujhe dekhā to thakan bhuul ga.ī hai

MUNAWWAR RANA

maiñ ne kal shab chāhatoñ kī sab kitābeñ phaaḌ deñ

sirf ik kāġhaz pe likkhā lafz-e-māñ rahne diyā

MUNAWWAR RANA

muddatoñ ba.ad mayassar huā maañ kā āñchal

muddatoñ ba.ad hameñ niiñd suhānī aa.ī

IQBAL ASHHAR

maañ baap aur ustād sab haiñ ḳhudā kī rahmat

hai rok-Tok un kī haq meñ tumhāre ne.amat

ALTAF HUSSAIN HALI

ai raat mujhe maañ kī tarah god meñ le le

din bhar kī mashaqqat se badan TuuT rahā hai

TANVEER SIPRA

duur rahtī haiñ sadā un se balā.eñ sāhil

apne maañ baap kī jo rose duā lete haiñ

MOHAMMAD ALI SAHIL

is liye chal na sakā koī bhī ḳhanjar mujh par

merī shah-rag pe mirī maañ kī duā rakkhī thī

NAZEER BAAQRI

bachche fareb khā ke chatā.ī pe so ga.e

ik maañ ubāltī rahī pathar tamām raat

UNKNOWN

maañ ḳhvāb meñ aa kar ye batā jaatī hai har roz

bosīda sī oḌhī huī is shaal meñ ham haiñ

MUNAWWAR RANA