LABOUR DAY SHAYARI Celebration of workers' day with Urdu Shayari

phūTne vaalī hai mazdūr ke māthe se kiran

surḳh parcham ufuq-e-sub.h pe lahrāte haiñ

ALI SARDAR JAFRI

bulāte haiñ hameñ mehnat-kashoñ ke haath ke chhāle

chalo muhtāj ke muñh meñ nivāla rakh diyā jaa.e

RAZA MAURANVI

•            

zindagī ab is qadar saffāk ho jā.egī kyā

bhuuk hī mazdūr kī ḳhūrāk ho jā.egī kyā

RAZA MAURANVI

• 
  

zamām-e-kār agar mazdūr ke hāthoñ meñ ho phir kyā

tarīq-e-koh-kan meñ bhī vahī hiile haiñ parvezī

ALLAMA IQBAL

• 
  

peḌ ke nīche zarā sī chhāñv jo us ko milī

so gayā mazdūr tan par boriyā oḌhe hue

SHARIB MAURANWI

• 
  

is liye sab se alag hai mirī ḳhushbū 'āmī'

mushk-e-mazdūr pasīne meñ liye phirtā huuñ

IMRAN AAMI

• 
  

maiñ ki ek mehnat-kash maiñ ki tīrgī-dushman

sub.h-e-nau ibārat hai mere muskurāne se

MAJROOH SULTANPURI

• 
  

•  

duniyā merī zindagī ke din kam kartī jaatī hai kyuuñ

ḳhuun pasīna ek kiyā hai ye merī mazdūrī hai

MANMOHAN TALKH

ta.amīr-o-taraqqī vaale haiñ kahiye bhī to un ko kyā kahiye

jo shīsh-mahal meñ baiThe hue mazdūr kī bāteñ karte haiñ

OBAIDUR RAHMAN