LABOUR DAY SHAYARI
1; so jaate haiñ fōtpath pe aḳhbār bichhā kar
mazdūr kabhī niiñd kī golī nahīñ khāte
2; farishte aa kar un ke jism par ḳhushbū lagāte haiñ
vo bachche rail ke Dibboñ meñ jo jhāḌū lagāte haiñ
3: tū qādir o aadil hai magar tere jahāñ meñ
haiñ talḳh bahut banda-e-mazdūr ke auqāt
4: bojh uThānā shauq kahāñ hai majbūrī kā saudā hai
rahte rahte station par log qulī ho jaate haiñ
5: hone do charāġhāñ mahloñ meñ kyā ham ko agar dīvālī hai
mazdūr haiñ ham mazdūr haiñ ham mazdūr kī duniyā kaalī hai
6: logoñ ne ārām kiyā aur chhuTTī puurī kī
yakum may ko bhī mazdūroñ ne mazdūrī kī
7 : aane vaale jaane vaale har zamāne ke liye
aadmī mazdūr hai rāheñ banāne ke liye
8: kuchal kuchal ke na fōt-pāth ko chalo itnā
yahāñ pe raat ko mazdūr ḳhvāb dekhte haiñ
9: ab un kī ḳhvāb-gāhoñ meñ koī āvāz mat karnā
bahut thak-hār kar fōtpath par mazdūr so.e haiñ
10: daulat kā falak toḌ ke aalam kī jabīñ par
mazdūr kī qismat ke sitāre nikal aa.e
11: saroñ pe oḌh ke mazdūr dhuup kī chādar
ḳhud apne sar pe use sā.ebāñ samajhne lage
12: maiñ ne 'anvar' is liye bāñdhī kalā.ī par ghaḌī
vaqt pūchheñge ka.ī mazdūr bhī raste ke biich
13: mill mālik ke kutte bhī charbīle haiñ
lekin mazdūroñ ke chehre piile haiñ
14: ḳhuun mazdūr kā miltā jo na ta.amīroñ meñ
na havelī na mahal aur na koī ghar hotā
15: mehnat kar ke ham to āḳhir bhūke bhī so jā.eñge
yā maulā tū barkat rakhnā bachchoñ kī guḌ-dhānī meñ
posted by Musafir-hu @ July 30, 2019
0 Comments
0 Comments:
Post a Comment
Subscribe to Post Comments [Atom]
<< Home